2020 यायलाच हवं...

2020 सारखं वर्ष शतकातून एकदा तरी यायलाच हवं...

जेव्हा माणूस स्वतच्याच धुंदीत पळत असतो...
चूक - बरोबर सगळं विसरून स्वतःचच खरं करत असतो...
आपली सगळी स्वप्न पूर्ण करण्यामध्ये साथ देणाऱ्या
आपल्या शरीराकडेसुद्धा जेव्हा तो दुर्लक्ष करायला लागतो... तेव्हा...
तेव्हा त्याला थांबवण्यासाठी कोरोना सारख्या रोगाला घेऊन 2020 सारखं वर्ष यायलाच हवं..

जेव्हा स्वतःलाच माणूस खूप मोठा तीस मार खान समजायला लागतो...
आपल्या स्वार्थासाठी झाडं तोडायला लागतो...
'Sea view bunglow' बांधण्यासाठी समुद्राच्या राज्यात शिरायला लागतो...
निसर्गाला for granted म्हणून माणूस जेव्हा घ्यायला लागतो तेव्हा...
चक्रीवादळाला घेऊन 2020 सारखं वर्ष यायलाच हवं...

जेव्हा समोरच्यावर आपण खूप विश्वास ठेवू लागतो
आणि समोरचा 'वाटलं' म्हणून विश्वास तोडतो....
अघोरीपणाला गंमत जेव्हा तो समजायला लागतो...
माणसातली माणुसकी जेव्हा तो विसरायला लागतो तेव्हा...
तेव्हा निसर्ग आणि प्राण्यांचा बळी घेणाऱ्या 2020 सारख्या वर्षाला यायलाच हवं...

जेव्हा ही सृष्टी निर्माण करणाऱ्या त्या अदृश्य शक्तीला
आणि आपल्याला जगवणाऱ्या या निसर्गाला विसरून
जेव्हा माणूस स्वतःला महान समजायला लागतो तेव्हा
"बाबा रे ... तुझ्यापेक्षा पण मोठी शक्ती आहे या जगात!" हे दाखवण्यासाठी;
माणसाचे डोळे उघडून डोकं जागेवर आणण्यासाठी;
2020 सारखं वर्ष शतकातून एकदा तरी  यायलाच हवं...